د شمېر کِتاب

اَتم باب

د ډيوو کېښودل

۱بيا مالِک خُدائ مُوسىٰ ته ووئيل چې، ۲”هارُون ته ووايه چې کله هغه اووۀ ډيوې په ډيوټ باندې ږدى، نو هغه به يې داسې ږدى چې د ډيوټ مخې ته رڼا ورکوى.“ ۳هارُون هم هغه شان وکړل اؤ ډېوې يې داسې کېښودې چې د ډيوټ مخې ته رڼا وه. ۴د سر نه تر بېخه پورې ډيوټ د ټکولو شوو سرو زرو نه جوړ وو، هم د هغې نقشې په مُطابق چې مالِک خُدائ مُوسىٰ ته ښودلې وه.

د ليويانو خِدمت اؤ وقف کېدل

۵بيا مالِک خُدائ مُوسىٰ ته ووئيل، ۶”ليويان د نورو بنى اِسرائيلو نه جُدا کړه اؤ هغوئ پاک کړه، ۷طريقه دا ده :  په هغوئ باندې د پاکوالى اوبۀ وشينده اؤ هغوئ ته ووايه چې ټول بدن کل کړى اؤ خپلې جامې ووينځى. نو هغوئ به پاک شى. ۸بيا يو څخے اؤ د غلې نذرانې د پاره اوړۀ چې د زيتُونو تېل ورسره ګډ وى دا به هغوئ واخلى، اؤ د ګُناه نذرانې د پاره به تۀ يو بل غوَيے بوځې. ۹بيا د بنى اِسرائيلو ټول قوم راغونډ کړه اؤ ليويان زما د حضُور خېمې په مخکښې ودروه. ۱۰بنى اِسرائيل دې خپل لاسُونه د ليويانو په سرُونو کېږدى، ۱۱اؤ بيا به هارُون ليويان د بنى اِسرائيلو نه د خاص تُحفې په توګه ما ته وقف کړى، چې هغوئ زما خِدمت وکړى. ۱۲ليويان به بيا خپل لاسُونه د دوو غوَيانو په سرُونو کېږدى، يو به د ګُناه نذرانې په توګه اؤ بل د سوزېدُونکې نذرانې په توګه مالِک خُدائ ته پېش کېږى، د دې د پاره چې د ليويانو کفاره ادا شى. ۱۳ليويان ما ته د خاص تُحفې په توګه وقف کړه اؤ هارُون اؤ د هغۀ زامن د هغوئ مشران جوړ کړه. ۱۴نو ليويان د نورو بنى اِسرائيلو نه جُدا کړه چې هغوئ زما شى. ۱۵کله چې تۀ ليويان پاک اؤ وقف کړې، نو هغوئ د خِدمت د پاره مُقدسې خېمې ته دننه تلے شى. ۱۶د بنى اِسرائيلو د ټولو مشرانو زامنو په ځائ ليويان زما دى اؤ هغوئ صِرف زما دى. ۱۷کله چې ما د مِصر په وطن کښې ټول مشران زامن ووژل، ما د بنى اِسرائيلو د هرې کورنۍ مشر زوئ اؤ هر يو وړومبے پېدا شوے ځناور خپل ځان ته وقف کړو. ۱۸اوس زۀ د بنى اِسرائيلو د ټولو وړومبو پېدا شوو زامنو په ځائ ليويان اخلم، ۱۹اؤ ليويان د بنى اِسرائيلو نه د خاص تُحفې په توګه د هارُون اؤ د هغۀ زامنو په حواله کوم چې په مُقدسه خېمه کښې د بنى اِسرائيلو د پاره خِدمت وکړى اؤ هغوئ به د بنى اِسرائيلو د پاره کفاره ادا کوى چې کله هغوئ مُقدس ځائ ته ډېر نزدې راشى نو چې وبا يې هلاک نۀ کړى.“ ۲۰نو مُوسىٰ، هارُون اؤ ټولو بنى اِسرائيلو ليويان وقف کړل، هم هغه شان چې څنګه مالِک خُدائ مُوسىٰ ته حُکم کړے وو. ۲۱ليويانو خپل ځانُونه پاک کړل اؤ جامې يې ووينځلې اؤ هارُون هغوئ مالِک خُدائ ته د خاص تُحفې په توګه پېش کړل. هارُون د هغوئ د پاره د پاکوالى کفاره ادا کړه. ۲۲خلقو هم هغه شان وکړل چې څنګه مالِک خُدائ د ليويانو په باره کښې مُوسىٰ ته حُکم کړے وو. نو ليويان په مُقدسه خېمه کښې د خِدمت کولو د پاره د هارُون اؤ د هغۀ زامنو د مشرۍ لاندې لاړل. ۲۳بيا مالِک خُدائ مُوسىٰ ته ووئيل، ۲۴”د پينځۀ ويشتو کالو عُمر نه واخله هر يو ليوے به زما د حضُور په خېمه کښې خپله د خِدمت ذِمه وارى ادا کوى، ۲۵اؤ چې عُمر يې پنځوس کاله شى نو هغه به نور خِدمت نۀ کوى. ۲۶د هغې نه پس، هغه د خپل هغه ليوى سره مدد کولے شى کُوم چې په خېمه کښې خپله ذِمه وارى ادا کوى، خو په خپله به هيڅ خِدمت نۀ کوى. نو داسې به تاسو ليويانو ته ذِمه وارۍ حواله کوئ.“