د ليويانو کِتاب

شپږويشتم باب

د فرمانبردارۍ د پاره برکتُونه

د ګردان کِتاب ۷ :  ۱۲‏-۲۴، ۲۸ :  ۱‏-۱۴

۱مالِک خُدائ ووئيل، ”بُتان، مجسمې، د کاڼو ستنې، يا داسې کاڼى مۀ جوړوئ چې عِبادت يې کېږى اؤ ورته سجده وکړئ. زۀ مالِک خُدائ ستاسو خُدائ پاک يم. ۲زما د سبت ورځ منئ اؤ د هغه ځائ درناوے کوئ چرته چې زما عِبادت کېږى. زۀ مالِک خُدائ يم. ۳کۀ تاسو زما د قانُون په مُطابق ژوند تېروئ اؤ زما حُکمُونو ته غاړه کېږدئ، ۴نو زۀ به په صحيح وخت باران وروم، هغه زمکه به فصلُونه پېدا کړى اؤ ونې به مېوې ونيسى. ۵ستاسو فصلُونه به دومره ډېر وى چې د انګُورو د راټولولو وخت پورې به تاسو غوبل کوئ اؤ تر هغه پورې به انګُور راټولوئ چې د غلې کَرلو وخت راورسېږى. د خوراک د پاره تاسو ته به هغه هر څۀ ملاوېږى چې تاسو يې غواړئ اؤ په خپل وطن کښې به تاسو په آمن ژوند کوئ. ۶زۀ به تاسو له ستاسو په وطن کښې آرام درکړم اؤ تاسو به بغېر د يرې نه خوب کوئ. زۀ به د هغه وطن خطرناک ځناور لرې کړم اؤ هلته به نور جنګ نۀ وى. ۷تاسو به په خپلو دُښمنانو بريالى شئ اؤ تاسو به هغوئ په جنګ کښې ووژنئ، ۸ستاسو پينځۀ کسان به سلو له شکست ورکړى اؤ سل کسان به لسو زرو له شکست ورکړى. ستاسو دُښمنان به په جګړه کښې شکست وخورى. ۹زۀ به په تاسو نظر وکړم اؤ ډېر اولاد به درکړم، زۀ به هغه تړون پُوره کړم چې ما ستاسو سره کړے دے. ۱۰ستاسو سره به دومره ډېره غله وى چې تاسو به هغه زَړه غله د دې د پاره وغورزوئ چې د نوى فصل د پاره ځائ پېدا شى. ۱۱زۀ به ستاسو په مېنځ کښې زما په مُقدسه خېمه کښې اوسېږم اؤ زۀ به ستاسو نه کله هم نفرت ونۀ کړم. ۱۲زۀ به ستاسو مل يم، زۀ به ستاسو خُدائ پاک يم اؤ تاسو به زما خلق يئ. ۱۳زۀ مالِک خُدائ ستاسو خُدائ پاک يم، چا چې د مِصريانو د غُلامۍ نه آزاد کړئ اؤ د هغوئ وطن نه يې راوويستلئ. ما هغه طاقت ختم کړو چې تاسو يې ټيټ کړى وئ اؤ د دې جوګه مې کړئ چې په اُوچتو سترګو ګرځئ.“

د سرکشۍ سزا

د ګردان کِتاب ۲۸ :  ۱۵‏-۶۸

۱۴مالِک خُدائ ووئيل، ”کۀ تاسو زما حُکمونه ونۀ منل، نو تاسو ته به سزا مِلاؤ شى. ۱۵کۀ تاسو زما د حُکمُونو منلو نه اِنکار وکړئ اؤ زما د حُکمُونو نه کرکه وکړئ اؤ زما تړون مات کړئ، ۱۶نو زۀ به تاسو له سزا درکړم. زۀ به په تاسو آفتُونه راولم يعنې لا عِلاجه بيمارۍ اؤ تبې چې تاسو به ړاندۀ کړى اؤ ستاسو ژوند به لنډ تنګ کړم. تاسو به تُخم وکَرئ، خو هيڅ ګټه به درنۀ کړى، ځکه چې ستاسو دُښمنان به په تاسو غالِب شى اؤ چې تاسو څۀ کَرلى وى نو هغوئ به يې وخورى. ۱۷زۀ به ستاسو نه مخ واړوم، نو تاسو به شکست وخورئ اؤ هغه خلق چې ستاسو نه نفرت کوى هغوئ به په تاسو حکومت وکړى، تاسو به دومره ويرېږئ چې څوک درپسې نۀ وى بيا به هم منډې وهئ. ۱۸کۀ د دې هر څۀ نه پس بيا هم ما ته غوږ ونۀ نيسئ، نو د ستاسو د نافرمانۍ په وجه زۀ به ستاسو سزا اووۀ چنده زياته کړم. ۱۹زۀ به ستاسو غرُور مات کړم، باران به نۀ ورېږى اؤ ستاسو زمکه به وچه شى اؤ د کاڼى په شان به سخته شى. ۲۰ستاسو ټول محنت به تاسو له هيڅ فائده درنۀ کړى، ځکه چې ستاسو زمکه به فصلُونه نۀ کوى اؤ ستاسو ونې به مېوه نۀ نيسى. ۲۱کۀ تاسو بيا هم زما مُخالفت کوئ اؤ زما د منلو نه اِنکار کوئ، نو زۀ به ستاسو سزا اووۀ چنده زياته کړم. ۲۲زۀ به ستاسو مېنځ ته خطرناک ځناور درولېږم اؤ دا به ستاسو ماشُومان ووژنى، ستاسو څاروى به تباه کړى اؤ ستاسو شمېر به دومره کم کړم چې سړکُونه به مو خوشى پاتى شى. ۲۳کۀ د دې هر څۀ نه پس هم زما خبرې ته غوږ ونۀ نيسئ اؤ بيا هم زما مُخالفت کوئ، ۲۴نو زۀ به هم ستاسو خِلاف شم اؤ زۀ به تاسو له د مخکښې نه اووۀ چنده زياته سزا درکړم. ۲۵زۀ به په تاسو يو جنګ راولم، زما د تړون د ماتولو سزا به درکړم اؤ کۀ تاسو په خپلو ښارُونو کښې د آمن د پاره راغونډ شئ، نو زۀ به په تاسو لا عِلاجه بيمارۍ راولېږم اؤ تاسو به زۀ ستاسو دُښمنانو ته حواله کړم نو هغوئ به په تاسو حکومت وکړى. ۲۶زۀ به په تاسو خوراک بند کړم، نو د لسو کورَنو اوړۀ به يو ښانک کښې يو ځائ تيارولے شى. هغوئ سره به خوراک ختم شى اؤ چې کله تاسو هر څۀ وخورئ، نو بيا به هم وږى يئ. ۲۷کۀ د دې هر څۀ نه پس هم زما خبرې ته غوږ ونۀ نيسئ اؤ زما د منلو نه اِنکار وکړى، ۲۸نو زما قهر به ستاسو خِلاف شى اؤ بيا به زۀ ستاسو سزا د مخکښې نه اووۀ چنده زياته کړم. ۲۹ستاسو لوږه به دومره زياته شى چې خپل بچى به وخورئ. ۳۰په غرُونو چې ستاسو کُومې عِبادت‌خانې دى هغه به تباه کړم، ستاسو د خوشبويۍ قُربان‌ګاه به ختمه کړم اؤ ستاسو مړى به د ستاسو په بې‌ساه بُتانو باندې وروغورزوم. زۀ به ستاسو نه نفرت وکړم. ۳۱زۀ به ستاسو د ښارُونو نه کنډرې جوړې کړم، ستاسو د عِبادت ځايُونه به تباه کړم اؤ ستاسو قُربانۍ به قبُولې نۀ کړم. ۳۲زۀ به ستاسو وطن داسې تباه کړم چې کُوم دُښمنان دا وطن ونيسى نو هغوئ به په دې تباهۍ باندې غمژن شى. ۳۳زۀ به په تاسو جنګ راولم اؤ په پردو وطنُونو کښې به مو خوارۀ وارۀ کړم. ستاسو وطن به خوشے پاتې شى اؤ ستاسو ښارونه به وران وېجاړ شى. ۳۴نو زمکه به د پُوره آرام د کالونو نه ښۀ خوند واخلى چې تاسو يې ورته پرېږدئ، دا به خوشى پرته وى اؤ آرام به وکړى اؤ تاسو به د خپلو دُښمنانو په وطن کښې اوسېږئ. ۳۶د ستاسو کُوم کسان چې په پردى وطن کښې وى هغوئ به دومره ويروم چې د هوا په وجه د پاڼې د معمُولى کش نه به هم تښتى. تاسو به داسې منډې وهئ لکه څوک چې په جنګ کښې په تاسو پسې وى اؤ ستاسو سره به نزدې هيڅ دُښمن نۀ وى خو تاسو به بيا هم غورزېږئ. ۳۷کله چې هيڅ څوک هم په تاسو پسې نۀ وى نو تاسو به په يو بل باندې غورزېږئ اؤ تاسو به د دې جوګه نۀ يئ چې د دُښمن په مخکښې ودرېږئ. ۳۸ستاسو د دُښمنانو وطن به تاسو ژوندى تېر کړى، تاسو به پردى وطن کښې مړۀ شئ. ۳۹ستاسو کُوم کسان چې ستاسو د دُښمنانو په وطن کښې ژوندى پاتى وى هغوئ به خراب‌تُراب شى، ستاسو خپلې ګُناه اؤ ستاسو د پلار‌نيکۀ د ګُناه په وجه به داسې وشى. د راتلُونکى وخت د پاره اُميد ۴۰خو ستاسو اولاد به د خپلو ګُناهونو اؤ د هغوئ د پلار‌نيکۀ د ګُناهونو اِقرار وکړى، چې هغوئ زما سره بې وفائى کړې ده اؤ زما خِلاف يې سرکشى کړې ده، ۴۱اؤ زۀ يې د خپل ځان خِلاف کړم اؤ چې هغوئ د دُښمنانو وطن ته ولېږم. کۀ بيا ستاسو د اولاد سخت زړُونه نرم شى اؤ د خپلې ګُناه اؤ سرکشۍ سزا ورته مِلاؤ شى، ۴۲نو زۀ به د يعقُوب، اِسحاق اؤ اِبراهيم سره خپل کړے تړون راياد کړم اؤ زۀ به خپل هغه تړون بيا تازه کړم چې خپلو خلقو له هغه وطن ورکړم. ۴۳اول خو به هغه وطن خامخا د هغې د خلقو نه خالى کېږى، چې دا د پُوره آرام نه ښۀ خوند واخلى اؤ هغوئ ته به زما د قانُون اؤ حُکمُونو نۀ منلو په وجه پُوره سزا مِلاؤ شى. ۴۴خو بيا هم، چې هغوئ لا د خپلو دُښمنانو په وطن کښې وى، نو زۀ به يې نۀ رد کوم، نۀ به ترې نفرت کوم اؤ نۀ به يې بېخى تباه کوم. هسې نه چې د هغوئ سره زما تړون مات شى، زۀ مالِک خُدائ د هغوئ خُدائ پاک يم. ۴۵زۀ به هغه تړون بيا تازه کړم چې ما د هغوئ د پلار‌نيکۀ سره کړے وو کله چې ما ټولو قومُونو ته خپل طاقت وښودلو چې خپل خلق مې د مِصر وطن نه راوويستل، چې زۀ مالِک خُدائ، د هغوئ خُدائ پاک اوسم.“ ۴۶دا ټول هغه قانُون اؤ حُکمونه دى چې مالِک خُدائ مُوسىٰ له د سينا په غرۀ باندې د اِسرائيليانو د پاره ورکړل.