د حضرت يشوَع کِتاب

شپږم باب

د يريحو غورزېدل

۱نو د يريحو دروازې پخې بندې وساتلے شوې چې بنى اِسرائيليان ورننه نۀ وزى نو د ښار نه نۀ څوک وتے شول او نه څوک ورننوتے شول. ۲مالِک خُدائ يشوَع ته ووئيل، ”ما يريحو سره د هغې د بادشاه او سره د هغې د بهادرو سپايانو، تا ته حواله کړے دے. ۳تۀ او ستا سپايان به روزانه تر شپږو ورځو پورې يو چکر د ښار نه ګېرچاپېره لګوئ. ۴اووۀ اِمامان به د لوظ صندوق نه مخکښې روان شى چې د هر يو سره به يو يو بيګل وى، چې اِمامان بيګلى غږوى نو په اوومه ورځ به تۀ او ستا سپايان د ښار نه ګېرچاپېره اووۀ چکرې لګوئ. ۵بيا دې هغوئ په يو اُوږد آواز سره بيګل وغږوى. او څنګه چې تاسو دا آواز واورئ نو ټول خلق دې د اُوچت آواز سره يو نعره ووهى نو د ښار دېوالونه به راوغورزېږى او بيا به ستاسو ټول لښکر سيدها ښار ته ورننوځى.“ ۶نو يشوَع د نون زوئ اِمامان راوغوښتل او ورته يې ووئيل، ”د لوظ صندوق واخلئ او په تاسو کښې دې اووۀ اِمامان د بيګلو سره مخکښې روان شى.“ ۷بيا هغۀ خلقو ته حُکم ورکړو چې، ”د ښار نه ګېرچاپېره مزل شروع کړئ او وسلحه بند سړى دې د مالِک خُدائ د لوظ صندوق نه مخکښې روان وى.“ ۸‏-۹نو چې څنګه يشوَع حُکم کړے وو، وسلحه بند سړى د بيګلو غږوُونکو اِمامانو نه مخکښې روان شول او په هغوئ پسې هغه اِمامان روان وُو چا چې د لوظ صندوق اُوچت کړے وو او شا ته ورته نور وسلحه بند سړى وُو. او په هغه ټول وخت کښې بيګلې غږېدې. ۱۰خو يشوَع خلقو له حُکم ورکړو چې، ”چغې مۀ وهئ او چې تر کومې پورې ما حُکم نۀ وى درکړے نو د خولې نه يوه خبره هم مۀ وباسئ.“ ۱۱هغۀ د دې ډلې کسانو ته ووئيل چې، ”د مالِک خُدائ د لوظ صندوق يو ځل د ښار نه ګېرچاپېره وګرځوئ.“ بيا هغوئ کېمپ ته واپس راغلل او شپه يې هلته تېره کړه. ۱۲‏-۱۳يشوَع په ورپسې ورځ سحر وختى پاڅېدو او په دويم ځل اِمامانو او سپايانو د ښار نه ګېرچاپېره چکر ولګولو هم په هغه ترتيب سره چې په وړاندينۍ ورځې يې کړى وُو. مخکښې وسلحه بند سړى ورپسې اووۀ اِمامان چې اووۀ بيګلې يې غږولې او هغه اِمامان چې د مالِک خُدائ د لوظ صندوق يې اُوچت کړے وو او په آخر کښې شاته نور وسلحه بند سړى وُو. او په هغه دوران کښې بيګلې غږېدې. ۱۴نو په دويمه ورځ هغوئ د ښار نه ګېرچاپېره يو ځل بيا چکر ولګولو او بيا کېمپ ته واپس راغلل هغوئ شپږ ورځې داسې کول. ۱۵په اوومه ورځ سحر وختى چې رڼا شروع کېدله نو هغوئ پاڅېدل او په دغه ورځ يې د ښار نه ګېرچاپېره اووۀ چکرې ولګولې صِرف په دې ورځ هغوئ ګېرچاپېره اووۀ چکرې ولګولې. ۱۶په اوؤم چکر باندې چې کله اِمامانو بيګلې وغږولې نو يشوَع خلقو ته حُکم ورکړو، ”چغې ووهئ ځکه چې مالِک خُدائ دا ښار تاسو له درکړے دے! ۱۷دا ښار او په دې کښې هر څۀ به مالِک خُدائ ته د نذرانې په توګه تباه کړے شى. صِرف راحب کنجره او د هغې کورنۍ به بچ کړے شى ځکه چې هغې زمونږ جاسوسانو له پناه ورکړې وه. ۱۸کوم څيزُونه چې تباه کولے شى د هغې نه به تاسو هيڅ هم نۀ اخلئ، کۀ چرې تاسو داسې وکړئ نو تاسو به د بنى اِسرائيلو په کېمپ باندې تکليف او تباهى راولئ. ۱۹هر څۀ چې د سپينو زرو، سرو زرو، زيړو يا د اوسپنې نه جوړ وى هغه به مالِک خُدائ ته وقف کړے شى. او هغه به د مالِک خُدائ په خزانه کښې کېښودے شى.“ ۲۰او اِمامانو بيګلې وغږولې او چې څنګه خلقو د دې آواز واورېدو نو هغوئ يوه اُوچته نعره ووهله او دېوالونه راوغورزېدل بيا ټول لښکر سيدها ښار ته ننوتلو او قبضه يې کړو. ۲۱هغوئ په ښار کښې هر يو کس، سړى او ښځې ځوانان او بوډاګان په خپلو تُورو باندې ووژل. هغوئ څاروى ګډې او خرونه هم ووژل. ۲۲خو يشوَع هغه دوو کسانو ته ووئيل چا چې جاسوسى کړې وه، ”د هغه کنجرې کور ته لاړ شئ او څنګه چې تاسو د هغې سره وعده کړې ده هغه او د هغې کورنۍ راولئ.“ ۲۳نو هغوئ لاړل او راحب يې سره د هغې د مور او پلار، وروڼو او خوېندو او باقى کورنۍ سره رابهر کړه هغوئ هغه ټوله کورنۍ او نوکران محفوظ ځائ ته بوتلل چې د بنى اِسرائيلو کېمپ سره نزدې وو. ۲۴بيا هغوئ ښار او په هغې کښې هر څۀ وسوزول خو صِرف سرۀ زر، سپين زر، زېړ او اوسپنه هغوئ پرېښودل او د مالِک خُدائ په خزانه کښې يې کېښودل. ۲۵خو يشوَع د راحب کنجرې او د هغې د ټولو خپلوانو ژوند بچ کړو، ځکه چې هغۀ کوم جاسوسان يريحو ته لېږلى وُو هغوئ له يې پناه ورکړې وه د هغې اولاد تر اوسه پورې د بنى اِسرائيلو سره اوسېږى. ۲۶په هغه وخت يشوَع سختې خېرې وکړې چې، ”څوک هم د يريحو د ښار د دوباره جوړولو کوشش کوى نو د مالِک خُدائ غضب دې ورباندې وى. څوک هم چې د دې بُنياد کېږدى نو هغه دې د مشرى زوئ نه لاس ووينځى. څوک هم چې د دې دروازې جوړوى نو هغه دې د کشر زوئ نه لاس ووينځى.“ ۲۷نو مالِک خُدائ د يشوَع مل وو او هغه په ټول مُلک کښې مشهُور شو.