د پېدايښت کِتاب

نهه دېرشم باب

حضرت يُوسف اؤ د فوطيفار ښځه

۱کله چې اِسمٰعيليانو يُوسف مِصر ته بوتلو، هغه يې فوطيفار نُومې د فِرعون په يو آفسر باندې خرڅ کړو، چې هغه د محل د څوکيدارانو مشر وو. ۲مالِک خُدائ د يُوسف مل وو اؤ هغه يې کامياب کړو. هغه د خپل مِصرى نېک په کور کښې اوسېدو، ۳چې هغۀ وليدل چې مالِک خُدائ د يُوسف مل دے اؤ هغه يې په هر کار کښې کامياب کړے دے. ۴نو فوطيفار د هغۀ نه خوشحال وو اؤ هغه يې خپل ذاتى خِدمت‌ګار اؤ د خپل کور مشر يې جوړ کړو اؤ خپل هر څۀ يې هغۀ ته وسپارل. ۵هم د هغه وخت نه، هم د يُوسف په وجه مالِک خُدائ د دې مِصرى کورنۍ له برکت ورکړے وو اؤ ورسره هغه هر څيز له يې برکت ورکړو چې د هغۀ په کور اؤ په پټو کښې وُو. ۶فوطيفار چې څۀ هم لرل هغه يې يُوسف له ورکړل چې خيال يې ساتى اؤ په خپله يې د خوراک نه بغېر د يو څيز فکر هم نۀ کولو. نو يُوسف ښائسته بدن لرلو اؤ ښُکلےځوان وو، ۷اؤ څۀ موده وروستو د هغۀ د نېک ښځې يُوسف ته د شوق په سترګه کتل اؤ ورته يې ووئيل، ”راشه اؤ ما سره څمله.“ ۸هغۀ اِنکار وکړو اؤ ورته يې ووئيل، ”ګوره! زما نېک په خپله په دې کور کښې د يو څيز فکر هم نۀ کوى، ځکه چې زۀ دلته يم. هغۀ زۀ په خپل هر څيز مشر جوړ کړے يم. ۹زۀ په دې کور کښې د هغۀ هومره اِختيار لرم اؤ هغۀ ستا نه بغېر زما نه هيڅ څيز هم نۀ دے منع کړے. نو بيا زۀ داسې غلط کار څنګه وکړم چې د خُدائ پاک ګُناهګار شم؟“ ۱۰اګرچې هغې به هره ورځ يُوسف ته وئيل، خو هغۀ د هغې نۀ خبره منله چې ورسره څملى اؤ نۀ ورنزدې کېدو. ۱۱خو يو ورځ چې کله يُوسف د کار د پاره کور ته ننوتو، په کور کښې يو خِدمت‌ګار هم نۀ وو. ۱۲هغې هغه د قميص نه ونيوو اؤ ورته يې ووئيل، ”راشه! ما سره څمله.“ خو هغۀ بهر منډه کړل اؤ وتښتېدو اؤ د هغۀ قميص د هغې په لاس کښې پاتې شو. ۱۳کله چې هغې وليدل چې د هغۀ نه قميص پاتې شو اؤ د کور نه يې بهر منډه کړل، ۱۴هغې د کور خِدمت‌ګاران راوغوښتل اؤ وې وئيل، ”دا وګورئ! زما خاوند چې کور ته کُوم عبرانے راوستلے دے هغه مُونږ شرموى. هغه زما کوټې ته راننوتو اؤ ما ته يې د لاس راچولو کوشش وکړو، خو ما په زوره زوره چغې ووهلې. ۱۵نو زما چغو سره هغۀ بهر منډه کړل اؤ قميص يې زما سره پرېښودو.“ ۱۶هغې دا قميص د يُوسف د نېک کور ته راتلو پورې وساتلو. ۱۷بيا هغې هغۀ ته هم هغه شان قيصه تېره کړه :  ”تا چې کُوم عبرانے نوکر دلته راوستلے دے هغه زما کوټې ته راننوتو اؤ لاس يې راواچولو. ۱۸خو چې کله ما چغې ووهلې، هغۀ بهر منډه کړل اؤ خپل قميص يې زما سره پرېښودو.“ ۱۹چې کله د يُوسف نېک دا قيصه واؤرېده کومه چې خپلى ښځې ورته بيان کړه، نو هغه د غُصې نه تک سُور شو. ۲۰نو يُوسف يې ونيولو اؤ په هغه قېد‌خانه کښې يې بند کړو چرته به چې د بادشاه قېديان قېد کولے شول اؤ هغه هلته په قېد‌خانه کښې وو. ۲۱خو مالِک خُدائ د يُوسف مل وو نو رحم يې پرې وکړو اؤ هغه د قېد‌خانې د آفسر په نظر کښې ښۀ راغلو. ۲۲هغۀ يُوسف د نورو ټولو قېديانو مشر جوړ کړو اؤ چې په قېد‌خانه کښې څۀ هم کېدل د هر څۀ ذِمه وارى يې ورکړه. ۲۳د قېد‌خانې آفسر د هغه يو څيز فکر هم نۀ کولو چې يُوسف له يې کُومه ذِمه وارى ورکړې وه، ځکه چې مالِک خُدائ د يُوسف مل وو اؤ هغه يې په هر کار کښې کامياب کولو.