د ګردان کِتاب

اُووم باب

د مالِک خُدائ قوم

د هِجرت کِتاب ۳۴ :  ۱۱‏-۱۶

۱مالِک خُدائ ستاسو خُدائ پاک به تاسو هغه وطن ته وردننه کړى چې د کوم قبضه کولو له ور روان يئ اؤ هغه به د دې نه ډېر قومُونه وشړى. کله چې تاسو مخ په وړاندې ځئ، نو هغه به اووۀ قومُونه وشړى کُوم چې ستاسو نه لوئ اؤ طاقتور دى :  هغوئ حِتيان، جرجاسيان، اموريان، کنعانيان، فارصيان، حِويان اؤ يبوسيان دى. ۲کله چې مالِک خُدائ ستاسو خُدائ پاک تاسو په هغه خلقو زورَور کړى اؤ شکست ورکړئ، نو هغوئ ټول ووژنئ. د هغوئ سره تړون مۀ کوئ اؤ چې هيڅ رحم ورباندې ونۀ کړئ. ۳د هغوئ سره ودُونه مۀ کوئ اؤ خپل اولاد هغوئ سره ودُونو ته مۀ پرېږدئ، ۴ځکه چې هغوئ به بيا ستاسو اولاد د مالِک خُدائ نه واړوى اؤ د هغوئ د معبُودانو عِبادت به کوى. نو بيا به د مالِک خُدائ غضب په تاسو راشى اؤ تاسو به سمدستى تباه کړى. ۵د هغوئ د قُربان‌ګاه ځايُونه وران کړئ، د هغوئ مُقدسې ستنې ټوټې ټوټې کړئ، د هغوئ د اشيرې بُت نښې راوغورزوئ اؤ د هغوئ بُتان وسوزوئ. ۶تاسو د مالِک خُدائ يعنې د خُدائ پاک مُقدس خلق يئ. نو ځکه هغۀ د زمکې د مخ نه خوښ کړئ چې د هغۀ خپل خاص خلق اوسئ. ۷مالِک خُدائ تاسو سره د دې د پاره مينه نۀ ده کړې اؤ نۀ يې خوښ کړى يئ چې تاسو د نورو خلقو نه زيات وئ، په حقيقت کښې تاسو د ټولو نه وړُوکے قوم وئ. ۸خو مالِک خُدائ ستاسو سره مينه وکړه اؤ هغه وعده پُوره کوى کُومه يې چې ستاسو پلار‌نيکۀ سره کړے وه. نو ځکه هغۀ د خپل لوئ طاقت سره تاسو بچ کړئ اؤ د مِصر بادشاه، فِرعون د غُلامۍ نه يې آزاد کړئ. ۹ياد ساتئ! چې مالِک خُدائ ستاسو خُدائ پاک، حقيقى خُدائ پاک دے اؤ هغه وفادار دے. هغه به خپل تړون پُوره کړى اؤ د هغه خلقو زرګُونو نسلُونو ته به نۀ بدلېدُونکې مينه وښائى څوک چې د هغۀ سره مينه لرى اؤ د هغۀ په حُکمُونو عمل کوى، ۱۰اؤ څوک چې ترې نه نفرت کوى نو په بدل کښې به هغه تباه کړى. هغه به هغه چا له په سزا ورکولو کښې سستى ونۀ کړى څوک چې د هغۀ نه نفرت وکړى. ۱۱تاسو ته چې څۀ ښودلے شوى دى نو په هغې عمل وکړئ، نن چې ما کُوم قانُون درکړے دے په هغې عمل وکړئ.

د فرمانبردارۍ کولو برکتُونه

د ګردان کِتاب ۲۸ :  ۱‏-۱۴

۱۲کۀ تاسو دې حُکمُونو ته غوږ ونيسئ اؤ په وفادارۍ سره پرې عمل کوئ، نو مالِک خُدائ ستاسو خُدائ پاک به ستاسو سره خپل تړون پُوره کړى اؤ خپله نۀ بدلېدُونکې مينه به درته وښائى، لکه څنګه چې هغۀ ستاسو پلار‌نيکۀ سره وعده کړے ده. ۱۳هغه به ستاسو سره مينه کوى اؤ برکت به درکړى، نو ستاسو شمېر به زيات شى اؤ ډېر اولاد به مو پېدا شى، هغه به ستاسو پټى برکتناک کړى، ستاسو غله، د انګُورو شراب اؤ د زيتُونو تېل به مو پېدا کېږى، اؤ هغه به تاسو له برکت درکړى چې تاسو له ډېر څاروى، چېلۍ اؤ ګډې درکړى. هغه به دا ټول برکتُونه تاسو له په هغه وطن کښې درکړى د کُوم چې هغۀ ستاسو پلار‌نيکۀ سره تاسو له د درکولو وعده کړې ده. ۱۴په دُنيا کښې د يو قوم سره به هم ستاسو په شان ډېر برکتُونه نۀ وى. نۀ به ستاسو يو کس اؤ نۀ به ستاسو يو څاروے شنډ ګرځى. ۱۵مالِک خُدائ به تاسو د ټولو بيمارو نه وساتى، هغه به په تاسو باندې داسې خرابې بيمارۍ نۀ راولى کُومې چې تاسو په مِصر کښې ليدلې وې، خو هغه بيمارۍ به ستاسو په ټولو دُښمنانو راولى. ۱۶هغه هر يو قوم تباه کړئ په کُوم چې مالِک خُدائ ستاسو خُدائ پاک تاسو زورَور کړى يئ اؤ چې په هغوئ باندې هيڅ رحم ونۀ کړئ. د هغوئ د معبُودانو عِبادت مۀ کوئ، ځکه چې دا به ستاسو د پاره يو دام جوړ شى. ۱۷په خپل زړۀ کښې دا مۀ وايئ چې دا قومُونه ستاسو نه په شمېر کښې زيات دى اؤ هغوئ تاسو نۀ شئ شړلے. ۱۸د هغوئ نه مۀ يرېږئ، هغه څۀ راپه ياد کړئ چې مالِک خُدائ ستاسو خُدائ پاک په فِرعون اؤ په ټول مِصر وکړل. ۱۹هغه سختې وباګانې، مُعجزې اؤ نښې رايادې کړئ چې تاسو په خپلو سترګو وليدلې اؤ هغه لوئ طاقت اؤ قُوت چې د کُوم په ذريعه مالِک خُدائ ستاسو خُدائ پاک تاسو آزاد کړئ. لکه څنګه چې هغۀ مِصريان تباه کړل، نو هغه ټول خلق به هم هغه شان تباه کړى چې تاسو ترې نه يرېږئ. ۲۰هغه به په هغوئ وارخطائى ورولېږى اؤ هغه به هغوئ هم تباه کړى چې څوک تښتى اؤ پټېږى. ۲۱نو د دې خلقو نه مۀ يرېږئ. مالِک خُدائ ستاسو خُدائ پاک ستاسو مل دے، خُدائ پاک لوئ اؤ يروُونکے دے. ۲۲چې تاسو مخ په وړاندې ځئ نو هغه به دا قومُونه لږ لږ شړى. تاسو به هغوئ ټول په يو ځل نۀ شئ شړلے، ځکه کۀ تاسو داسې وکړل، نو ځنګلى ځناور به زيات شى اؤ دا به ستاسو د پاره يوه خطره جوړه شى. ۲۳مالِک خُدائ به تاسو ستاسو په دُښمنانو زورَور کړى اؤ تر هغې پورې به وارخطا وى چې تر څو تباه شوى نۀ وى. ۲۴هغه به د هغوئ په بادشاهانو تاسو زورَور کړى. تاسو به هغوئ ووژنئ اؤ هغوئ به هېر کړے شى. هيڅ څوک به ستاسو مخه نۀ شى نيولے، تاسو به هر يو تباه کړئ. ۲۵د هغوئ بُتان وسوزوئ. په دې باندې چې کُوم سپين زر يا سرۀ زر لګېدلى وى، د هغې خواهِش مۀ کوئ، هغه ترې نه د خپلو ځانُونو د پاره مۀ اخلئ. ګنى دا به ستاسو د پاره يو دام جوړ شى، ځکه چې مالِک خُدائ ستاسو خُدائ پاک د بُت پرستۍ نه نفرت کوى. ۲۶هغه بُتان خپلو کورُونو ته مۀ راوړئ، ګنى په تاسو به هم هغه لعنت وى کُوم چې په هغوئ دے. تاسو خامخا د دې بُتانو نه کرکه کوئ اؤ سپک ورته ګورئ، ځکه چې دا لعنتى دى.