د تاريخ دويم کِتاب

اتم باب

د حضرت سليمان کارنامې

(د بادشاهانو اول کِتاب ۹:_۱۰‏-۲۸)

۱سليمان په خپل محل او د مالِک خُدائ په کور جوړولو کښې شل کاله ولګول. ۲هغۀ هغه ښارونه هم بيا جوړ کړل چې حيرام بادشاه ورکړى وُو او بنى اِسرائيليان يې ورولېږل چې په هغې کښې اوسېږى. ۳سليمان بيا حمات ضوباه ته لاړو او دا علاقه يې قبضه کړه ۴او په صحرا کښې د پَخو دېوالونو ښار تدمور يې هم قبضه کړو. هغۀ په حمات کښې هغه ټول ښارونه هم بيا جوړ کړل چې کوم ښارونه د ګودامونو دپاره اِستعمالېدل. ۵سليمان دا ښارونه هم بيا جوړ کړل: پاسنے بيت‌حورون او لاندينے بيت‌حورون چې دا د پَخو دېوالونو ښارونه وُو چې مضبوطې دروازې يې لرلې، ۶د بعلات ښار، هغه ټول ښارونه چې د سامان ګودامونه وُو او هغه ښارونه چرته چې د هغۀ اسونه او جنګى ګاډۍ ودرېدلې. هغۀ د يروشلم، لبنان او د هغه ټولې علاقې کوم آبادے کول غوښتل هغه يې سر ته ورسول او بادشاهى يې کوله. ۷‏-۸سليمان د کنعان د خلقو ټول اولاد داسې نوکران کړل چې په زور ترې نه کار اخستلے شو. دا هغه کسان وو کوم چې بنى اِسرائيلو نه ژوندى پاتى شوى وو کله چې بنى اِسرائيلو هغه مُلک ونيولو. په دې کښې حِتيان، اموريان، فارصيان، حِويان او يبوسيان وُو، چې د هغوئ اولاد تر نن وخته پورې غلامان دى. ۹د بنى اِسرائيلو نه په زور کار نۀ شو اخستلے، خو د فوجيانو، آفسرانو، د جنګى ګاډو مشرانو او په اسونو سوارو کسانو په توګه يې خِدمت کولو. ۱۰سليمان د بنى اِسرائيلو نه دوه نيم سوه آفسران مقرر کړل چې په دغه خلقو مشرى وکړى. ۱۱سليمان خپله ښځه يعنې د مِصر د فِرعون لور د داؤد د ښار نه هغه کور ته بوتله چې کوم يې د هغې دپاره جوړ کړے وو. هغۀ ووئيل، ”هغه دې د بنى اِسرائيلو بادشاه داؤد په محل کښې نۀ اوسېږى، ځکه چې چرته د لوظ صندوق پاتې شوے وو نو هغه ځائ مقدس دے.“ ۱۲سليمان په هغه قربان‌ګاه باندې مالِک خُدائ ته سوزېدونکې نذرانې پېش کړې کومه چې هغۀ د خُدائ پاک د کور په مخکښې جوړه کړې وه. ۱۳هغۀ د هرې مقدسې ورځې دپاره د موسىٰ د شريعت د حُکم په مطابق سوزېدونکې نذرانې پېش کړې: د سبت د ورځو، د نوې مياشتې اخترونو او د کال درې کالنى اخترونو، د پتيرې روټۍ اختر، د ريبلو اختر او د جونګړو اختر. ۱۴اِمامانو ته د ذِمه وارو حوالو کولو دپاره سليمان د خپل پلار داؤد په اصُولو باندې عمل وکړو. هغۀ ليويان هم مقرر کړل چې په ثناء صِفت وئيلو کښې او د اِمامانو سره د هغوئ په کارونو کښې مدد کوى. او هغۀ د ډلو په مطابق په دروازو باندې څوکيداران هم ودرول، ځکه چې د خُدائ پاک خِدمت کوُونکى داؤد هم دغه شان حُکم کړے وو. ۱۵داؤد چې د خزانو او نورو معامِلو دپاره اِمامانو او ليويانو ته کوم اصُول ښودلى وُو هغه پوره پوره سر ته رسېدلى وُو. ۱۶په هغه وخت کښې د سليمان ټول کارونه پوره شول. د مالِک خُدائ د کور د بُنياد نه واخله تر سر ته رسولو پورې د هغۀ ټول کارونه په صحيح طريقې سره سر ته ورسېدل. ۱۷سليمان عصيون جابر او ايلوت ته لاړو، دا د ادوم په علاقه کښې د بحرِقُلزم په غاړه د سمندرى جهازونو ځايُونه دى. ۱۸حيرام بادشاه د خپلو آفسرانو او د تجربه‌کاره کشتو چلاونکو د مشرۍ لاندې هغۀ له سمندرى جهازُونه ولېږل. هغوئ د سليمان د آفسرانو سره د اوفير مُلک ته جهازُونه بوتلل او سليمان له يې د پينځلسو زرو کيلو نه زيات سرۀ زر راوړل.